Guía de nomes galegos

Do hebreo Mikha'el, nome teofórico que reproduce a frase mi kha 'El 'quen como Deus?'. Pasou ao grego e ao latín como Michael.

San Miguel é o máis popular dos arcanxos: guerreiro, cabaleiro, príncipe das milicias dos anxos, seres de sexo indefinido que exercen de mensaxeiros entre Deus e os homes. No Antigo Testamento é o capitán das milicias dos anxos fieis a Deus fronte aos rebeldes encabezados por Luzbel ou Satanás. Na Apocalipse de san Xoán é quen salva a muller que acaba de dar a luz, ao vencer o dragón das sete cabezas. No catolicismo conduce as almas dos mortos e pésaas nunha balanza no Xuízo Final (así é representado na arte).

Santa Micaela (século XIV) é patroa de Pesaro (Italia).

É famoso o santuario de Le-Mont-Saint-Michel (Normandía-Francia), centro de peregrinacións e importante estación do Camiño de Santiago. Tamén teñen moita sona o santuario de St. Michael de Cornualla (Gran Bretaña) e o da Sacra di San Michele, símbolo da rexión do Piemonte (Italia), que probablemente inspirou a Umberto Eco para a súa novela O nome da rosa.

Artistas como o italiano Michelangelo Buonarroti (1475-1564), escritores como Miguel de Cervantes Saavedra (1547-1616) ou Miguel Delibes Setién (1920-2010); o francés Michel de Montaigne (1533-1592); o químico e físico inglés Michael Faraday (1791-1767) ou o político ruso Mikhaïl S. Gorbachev (1931-2022), derradeiro presidente da URSS (1989-1991).

En Galicia lembramos o escultor barroco Miguel de Romai (1670-1740) e o arquitecto neoclásico Miguel Ferro Caaveiro (1704-1807). Nos tempos contemporáneos, lembramos a Micaela Chao Maciñeira (1892-1928), natural de Viveiro, primeira conselleira da sección feminina das Irmandades da Fala, en 1918, desde onde loitou polos dereitos da muller. Por outra banda, tamén merece ser lembrado o bispo e académico da RAG Miguel Anxo Araúxo Iglesias (1920-2007), que apoiou o uso do idioma galego na liturxia católica.