Guía de nomes galegos

Nome de orixe grega que aparece nos primeiros séculos da era cristiá en Roma; vén de Evarestus, Evaristus, levado por un dos primeiros papas (97-105), morto mártir no imperio de Adriano. Na súa base está o grego Euárestos, nome persoal correspondente ao adxectivo euárestos 'grato, que comprace'. Xa en grego aparece, a carón deste, a forma Euáristos, quizais procedente dun cruzamento por etimoloxía popular con áristos 'o mellor'.

Santo Evaristo, papa (97-105), fillo dunha familia xudía e nado en Belén, sufriu martirio na persecución de Traxano.

O coruñés Evaristo Martelo Paumán del Nero (1853-1928), conde de Andeiro e marqués de Almeiras, poeta en lingua galega. Polo que o propio Castelao contou publicamente, este personaxe, que tamén tiña pazo en Rianxo, influíu nel cando era un neno para que non se avergonzase de falar a lingua galega. Dixéralle o seguinte: “Fala galego coma min, pois xa o falaba un antecesor meu, Paio Gómez Chariño, cando Galicia era unha nación”.

Tamén foi o nome de Evaristo González Fernández (1917-1994), coñecido como Evaristo de Sela polo seu lugar de nacemento (Sela- Arbo), profesor de grego e poeta, o primeiro tradutor ao galego da Ilíada e a Odisea de Homero, en 1990.