Na Biblia, Xeremías (c. 650 - c. 585 a. C.) foi un dos catro profetas maiores de Israel. Mostrábase pesimista pola situación política do seu país, consciente da debilidade do reino. Debido a isto, aconselloulles aos seus reis a ruptura da alianza con Exipto e a submisión aos monarcas babilónicos, máis poderosos. O tempo daríalle a razón e Xerusalén sería conquistada por Nabucodonosor (585 a. C.), que destruíu o templo e levou consigo como escravos milleiros de xudeus —foi a catividade de Babilonia—, entre eles Xeremías, que ao cabo dun tempo sería posto en liberdade, polo que moitos compatriotas o consideraron un traidor e o lapidaron.
