Guía de nomes galegos

Do latín Diana, nome dunha deusa moi popular en Roma, identificada coa Artemisa grega, que presidía a caza e simbolizaba a Lúa. O nome ten a mesma raíz ca o latino dius 'celeste, divino; luminoso'.

Diana foi unha deusa da mitoloxía romana —correspondente á Artemisa grega, filla de Zeus e de Leto—, irmá xemelga de Apolo. Era a deusa dos bosques e da caza, e tamén protectora das amazonas, mulleres guerreiras coma ela.

O nome utilizábase en Roma, pero o cristianismo primitivo rexeitouno. A primeira santa con este nome é do século XIII, en que se documenta a existencia da beata dominicana Diana degli Andalò, fundadora dun convento en Boloña (Italia).

No século XV, o Renacemento puxo en circulación este e outros nomes clásicos como Xulio, César, Aquiles etc.

Diana de Poitiers (século XVI) foi unha famosa favorita de Henrique II de Francia.

Nos tempos actuais tivo gran sona a inglesa Diana Spencer (1961-1997), princesa de Gales a raíz do seu matrimonio en 1981 con Carlos, herdeiro da coroa británica, con quen tivo dous fillos.