Guía de nomes galegos

Formado dunha base brig, de orixe celta, que ao parecer significaba 'altura, outeiro, monte' e que, por extensión, debeu de acabar asumindo o significado de 'comunidade que vive nunha altura', é dicir, posiblemente 'castro'. É o mesmo elemento que está na base de tantos topónimos galegos acabados en -bre como Bañobre, Barallobre, Deixebre, Alcabre, Xiabre e Landrove, O Grove etc.

Brigo, segundo a historia mítica galega, foi o primeiro poboador de Galicia, fillo de Túbal, neto de Xafet e bisneto de Noé. O rei Brigo sería o pai da raza brigantina e tería tres fillos: Artai, Hiar e Gall; este último casaría coa súa sobriña Celt, filla de Artai.