Guía de nomes galegos

Do grego Andréas. Uns explícano como derivado de  andreía 'virilidade, valor', outros como a redución cariñosa dalgún nome composto de andr 'home', 'varón' (como Andrócles, Andrómachos). A forma Andreu consérvase como apelido.

Santo André é un dos doce apóstolos de Cristo, irmán de san Pedro. Segundo a tradición, evanxelizou a Escitia (na actual Rusia), apostolado non confirmado, aínda que se admite que estivo na banda oeste do mar Negro. Morreu crucificado nunha cruz en forma de aspa, o atributo persoal da súa iconografía. A cruz de santo André, en aspa de cor branca sobre fondo azul, é o motivo principal da bandeira de Escocia. O santuario de Santo André de Teixido, preto do cabo Ortegal, é un dos de maior peregrinación espontánea dos crentes galegos, pois, segundo a tradición, é de obriga visitalo polo menos unha vez na vida, tal como se vaticina no famoso dito popular: “A santo André de Teixido vai de morto o que non foi de vivo”.

Os músicos Andrés Gaos Berea (1874-1959) e Andrés Luis Gaos Guillochón (1932); o arquiveiro, editor e filólogo Andrés Martínez Salazar (Astorga 1846 - A Coruña 1923); o arquitecto Andrés Fernández-Albalat Lois (1924-2019) e o cantautor ferrolán Andrés do Barro (1947-1990).

Os pintores italianos Andrea di Cione ‘Verrocchio’ (século XV) e Andrea del Sarto (século XVI); os escritores franceses André Gide (séculos XIX-XX), André Breton e André Malraux (século XX); o guitarrista español Andrés Segovia (1893-1987) e o físico ruso Andrei Sakharov (1921-1989).

Andrea Dworkin (1946-2005), ensaísta estadounidense, teórica do feminismo radical.

Andrea López Chao, nada en Mondoñedo en data descoñecida do século XIX, foi unha mestra galega na emigración cubana que chegou a ser presidenta do  Centro Galego da Habana.

Lou Andreas-Salomé (nacida como Louise von Salomé), nada en San Petersburgo en 1861 e finada en Göttingen en 1937, foi unha intelectual ruso-alemá, amiga de Rilke e de Freud.