A exposición 'Antonio Fraguas, memoria dun soño' arrinca na biblioteca Ánxel Casal

Santiago de Compostela foi un dos espazos vitais esenciais do protagonista do Día das Letras Galegas 2019. A cidade onde pasou as últimas décadas da súa vida acolle desde hoxe a mostra Antonio Fraguas, memoria dun soño. Viaxe a unha Galicia orgullosa de si mesma, unha exposición de doce paneis organizada pola Xunta de Galicia que nos vindeiros meses poderá verse noutras once localidades galegas. O presidente da Real Academia Galega, Víctor F. Freixanes, participou na biblioteca Ánxel Casal na inauguración da mostra, un percorrido pola vida e a obra do autor do Día das Letras Galegas que arrica na súa Insuela natal, en Cotobade, e remata coa posta en marcha do Museo do Pobo Galego e os recoñecementos que mereceu nos seus últimos anos de vida.
Detalle do panel de presentación da exposición


"Antonio Fraguas representa a esa xeración que se preocupou por que non se perdese a memoria e, por tanto, que non se perdese a lealdade dun pobo coa súa propia cultura, coa súa propia lingua", salientou o presidente da Academia na súa intervención. O conselleiro de Cultura, Román Rodríguez, definiu pola súa banda o homenaxeado como unha "figura humanista" que entronca co sentido do Día das Letras Galegas, "o acontecemento cultural que máis contribúe a vertebrar o país".

Justo Beramendi, presidente do padroado do Museo do Pobo Galego, o proxecto ao que Antonio Fraguas lle dedicou as últimas décadas da súa vida, salientou a importancia de iniciativas que, como esta mostra, serven para difundir valores positivos relacionados co homenaxeado entre a xente nova que a poderá ver en bibliotecas ou os centros de ensino. A presidenta do Consello da Cultura Galega, Rosario Álvarez, puxo o acento na gran "capacidade docente" de Fraguas dentro e fóra das aulas, un perfil, o de transmisor de coñecemento, ao que tamén fixo referencia a concelleira de Acción Cultural de Santiago, Branca Novoneyra. Coma ela, o alcalde de Cerdedo-Cotobade, Jorge Cubela, manifestou a súa satisfacción por que o Día das Letras Galegas deste 2019 estea dedicado a un veciño ilustre da vila.

Tras facer parada en Santiago de Compostela, a exposición poderá verse tamén en Arteixo, A Coruña, Celanova, Cerdedo-Cotobade, A Estrada, Ferrol, Lugo, Ourense, Pontevedra, Santiago de Compostela, Vigo e, da man da Fundación Otero Pedrayo, Amoeiro.

Dicionario

Novas da Academia

Subscríbete

Cursos de Verán 2019


Toda a información
nesta páxina

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 378

Boletín da Real Academia Galega
nº 378

Consultar

Cadernos de Lingua
nº 36

Consultar